26/09/2020
170 جار خوێنراوەتەوە
لوبنان.. موستەفا ئەدیب لە ئەرکی پێکھێنانی حکومەت كشایه‌وه
په‌یام
موستەفا ئەدیب، راسپێردراو بۆ پێکهێنانی حکوومەتی نوێی لوبنان، بەهۆی بێ ئەنجامبوونی کارەکانی کە سێ هەفتەی خایاند، ئەرکەکەی رادەستکردەوە.
ئەدیب کە بە پشتیوانی پارتە سیاسیەکانی موسوڵمان و مەسیحیەکان لە ٣١ی ئابدا ئەرکی پێکهێنانی حکوومەتی وەرگرت، دوێنێ ئەنجامی کارەکانی کە چەند هەفتەیەکە درێژەی هەیە بۆ پێکهێنانی حکوومەتی تەکنۆکرات لەگەڵ سەرکۆماری وڵاتەکەی میشێل عەون بەشکرد و، ئەمڕۆش سەرلەنوێ سەردانی کۆشکی سەرۆکایەتی کۆماری بەعبەدا-ی کردەوە.
دوای کۆبوونەوەی لەگەڵ سەرکۆمار، موستەفا ئەدیب لە لێدوانێکی رۆژنامەوانییدا ئاماژەی بەوە کرد کارەکانی بۆ پێکهێنانی حکوومەتێک کە تەواو لە تەکنۆکراتەکان پێکبێت لە لایەن گرووپە سیاسییەکانەوە پێشوازی لێنەکراوە، لەبەرئەوە وازی لە ئەرکەکەی هێناوە.
ئەدیب بە وتنی ''خوا لوبنان و لوبنانيیەکان بپارێزێت'' کۆتایی بە لێدوانە رۆژنامەوانییەکەی هێنا.
لە روونکردنەوەیەکیشدا کە لە لایەن کۆشکی سەرۆکایەتی کۆمارەوە بڵاوکراوەتەوە، ئاماژە بەوە کراوە دوای ئەوەی موستەفا ئەدیب ئەو ئاستەنگ و بەربەستانەی بەشکرد کە لە کاتی بەڕێوەبردنی کارەکانیدا بۆ پێکهێنانی حکوومەت هاتوونەتە سەر رێگای، بە سەرکۆماری راگەیاندووە کە ئەرکەکەی وازلێهێناوە.
سەرکۆماریش بەپێی دەستوور هەنگاوی پێویست دەگرێتەبەر لەبارەی پێکهێنانی حکوومەتی نوێ.
لە تۆڕە کۆمەڵایەتیەکان شەیری بکە