بەرشەلۆنە هەنگاوی کرداری بۆ گواستنەوەی دێپای نەناوە

پەیام سپۆڕت - بڕیار تەها

جونینیۆی بەڕازیلی و بەڕێوەبەری وەرزشی یانەی لیۆنی فەرەنسی ڕایدەگەیەنێت، هیچ کەسێک لە یانەی بەرشەلۆنەی ئیسپانی سەبارەت بە نرخی میمفیس دێپای هێرشبەری یانەیەکەیان پەیوەندی پێوە نەکردوون.

 
پاش شکستی یانەکەیان بەرانبەر یانەی مونپیلیە لە لێدوانێکدا بۆ گۆڤاری فرانس فوتبۆڵی فەرەنسی، جونینیۆ سەبارەت بە یەدەگبوونی دێپای لەو یارییەدا ڕەتیکردەوە پەیوەندی بە ڕۆیشتنی یاریزانەکەوە هەبێت و باسی لەوە کرد ڕاهێنەری یانەکەیان کۆمەڵێک گۆڕانکاری ماناداری کردووە، چونکە لە 10 ڕۆژی داهاتوودا یانەکەیان سێ یاری دیکە لە خولی فەرەنسی ئەنجام دەدات.

لە بەشێکی دیکەی قسەکانیدا بەڕێوەبەرە وەرزشییەکەی یانەی لیۆن وتی: تا ئێستا سەبارەت بە هەردوو یاریزانی یانەکەمان دیپای و حسام عەوار هیچ گرێبەستێکمان بەدەست نەگەیشتووە.

لە درێژەی قسەکانیدا جونینیۆ ئاشکرای کرد، هیچ کەسێک لە یانەی بەرشەلۆنە بە پەیوەندییەکی تەلەفونیش سەبارەت بە نرخی دێپای پرسیاریان نەکردووە.

لە کۆتایشدا بەڕێوەبەرە وەرزشییەکە باسی لەوە کرد، ئەوان لەوە تێگەیشتوون ئەگەر یاریزانەکە بمێنێتەوا ئەوا زۆر دڵخۆش دەبێت لە وەرزێکی نوێدا هاوکاری یانەکەی بکات، ئەگەر یاریزانەکە بیەوێت بروات ئەوا دەبێت گرێبەستیان بەدەست بگات.