سلێمانی.. شه‌وی رابردوو سێ كه‌س به‌هۆی دوو ڕووداوی هاتوچۆوه‌ گیانیان له‌ده‌ستداوه‌

په‌یام

ڕاگه‌یاندنی هاتوچۆی سلێمانی بڵاویكرده‌وه‌، شه‌وی ڕابردوو ڕووداوێکی هاتوچۆ ڕوویداوه‌ و له‌ ئاكامدا (٦) قوربانی لێکەوتەوە.

ڕوونی كرده‌وه‌، کاتژمێر (۱٠:٤٥)خولەکی ئەمشەو ڕووداوێکی هاتوچۆ لەجۆری وەرگەڕان لەسەر ڕێگەی سلێمانی - عەربەت لەفەرعی گوندی خەراجیان ڕویدا، بەو هۆیەوە دوو کەس گیانیان لەدەستدا و چواری دیکەش بریندار بوون.

ڕایشیگه‌یاند، هۆکاری ڕووداوەکەش دەگەڕێتەوە بۆ پابەند نەبوون بەڕێنماییەکانی هاتوچۆ و تیژڕەوی.

له‌ لایه‌كی دیكه‌وه‌ بەهۆی ڕووداوێکی دیكه‌وه‌ کەسێک گیانی لەدەستدا و کەسێکیتر بریندار بوو.

هاتوچۆی سلێمانی ڕایگه‌یاند، له‌سه‌ر ڕێگای پشتێنەی کەلار ڕووداوێکی هاتووچۆ ڕوویدا، ڕووداوەکە لە نێوان دوو ئۆتۆمبێل بووە لە جۆرەکانی نیسان سێنترا و کیا سۆرینتۆ، بەهۆی ڕووداوەکەوە شۆفێری (کیا)کە گیانی لەدەستدا و سەرنشینێک بەسەختی بریندار بوو، زیانی مادی زۆر بەر ئۆتۆمبێلەکان و ستوونی کارەبا کەوتووە.

ڕاشیگه‌یاند، بریندارەکە ڕەوانەی نەخۆشخانەی شەهید هەژار کراوە، مەفرەزەکانی هاتوچۆ لەسەر ڕووداوەکەن و لێکۆڵینەوەیان لە چۆنیەتی ڕوودانی ڕووداوەکە دەستپێکردوە.