16/07/2020
513 جار خوێنراوەتەوە
هه‌ژماری تویته‌ری ژماره‌یه‌ك كه‌سایه‌تی ناسراو هاك كران
په‌یام
هه‌ژماری ژماره‌یه‌ك كه‌سایه‌تی ناودار هه‌ر له سیاسه‌تمه‌دارانه‌وه تاكو خاوه‌نكاران له لایه‌ن ژماره‌یه‌ك هاككه‌ری نه‌ناسراوه ده‌ستیان به‌سه‌ردا گیرا.
له‌نێو ئه‌و كه‌سایه‌تییانه‌دا كه هه‌ژماره‌كانیان هاك كراون هه‌ریه‌ك له سه‌رۆكی پێشووی ئه‌مریكا، باراك ئۆباما؛ كاندیدی دیموكراته‌كان بۆ سه‌رۆكایه‌تی ئه‌مریكا، جۆ بایدن؛ به‌ڕێوه‌به‌ری باڵای ئامازۆن، جێف بێزۆس؛ دامه‌زرێنه‌ری مایكرۆسۆفت، بیل گیتس؛ به‌ڕێوه‌به‌ری باڵای تێسلا، ئێلۆن موسك؛ خاوه‌نكاری ملیاردێر، میكایل بلوومبێرگ و گۆرانیبیێژی راك، كانیه وێست ده‌بیندرێن.
جگه له‌و كه‌سایه‌تییانه هه‌روه‌ها هه‌ژماری تۆڕی كۆمه‌ڵایه‌تیی كۆمپانیاكانی وه‌ك ئه‌پڵ و ئوبه‌ر-یش ده‌ستیان به‌سه‌ردا گیراوه.
له ڕێگای بڵاوكردنه‌وه‌ی پۆستێكه‌وه له‌و هه‌ژماره هاككراوانه‌وه ناونیشانی بیتۆشنێكی فره‌هاوپشك دراوه و داوا كراوه پاره بۆ ئه‌و ناونیشانه ره‌وانه بكرێت. له زۆربه‌ی تویته‌كاندا ئاماژه به‌وه دراوه كه له به‌رامبه‌ر ره‌وانه‌كردنی هه‌ر هه‌زار دۆلارێك بۆ ئه‌و ناونیشانه، ئه‌وا دوو هه‌زار دۆلار ده‌درێته‌وه.
دوای ئه‌م رووداوه تویته‌ر لەڕێگای هه‌ژماری پشتیوانی خۆیه‌وه له‌باره‌ی ئه‌م رووداوه‌وه روونكردنه‌وه‌یه‌كی كورتی دا، كه تیایدا هاتووه "هه‌ست به‌و رووداوه ده‌كه‌ین كه كاریگه‌ری كردووته سه‌ر نهێنیپارێزی هه‌ژماره‌كانی تویته‌ر. لێكۆڵینه‌وه له‌و بابه‌ته‌دا ده‌كه‌ین و بۆ چاككردنه‌وه‌یش هه‌نگاو ده‌نێین. له ماوه‌یه‌كی نزیكدا هه‌موو كه‌سێك ئاگادار ده‌كه‌ینه‌وه".
له ماوه‌یه‌كی كه‌میشدا ئه‌و تویتانه‌ی له هه‌ژماره هاككراوه‌كانه‌وه نووسرابوون، سڕدرانه‌وه.
لە تۆڕە کۆمەڵایەتیەکان شەیری بکە