ئینتەرمیلان نرخی لاوتارۆی بۆ بەرشەلۆنە کەم کردەوە

پەیام سپۆڕت - بڕیار تەها

یانەی ئینتەر میلانی ئیتاڵی نرخی دەستبەرداربوون لە لاوتارۆ مارتێنزی ئەرجەنتینی و هێرشبەری یانەكەی دیاری دەكات و بە كەمكردنەوەی نرخەكەشی ئومێدەكانی بەرشەلۆنە بۆ گواستنەوەی دەبوژێنێتەوە.

 
ڕۆژنامەی كۆرێری دیلۆ سپۆرتی ئیتاڵی ئاشكرای دەكات، بیروڕای یانەی ئینتەر میلان لە بارەی لاوتارۆ مارتینێزەوە لە گواستنەوەكانی داهاتوو گۆڕانكاری بەسەردا هاتووە، بە جۆرێك دوای كۆتایی هاتنی مەرجی هەڵوەشاندنەوەی گرێبەستەكەی كە 111 ملیۆن یۆرۆ بوو، یانەكە نرخی ئەو یاریزانەی بۆ 90 ملیۆن یۆرۆ كەمكردۆتەوە و ئەوەش دەرگا لە بەردەم بەرشەلۆنەدا دەكاتەوە و تا هەوڵەكانی بۆ گواستنەوەی دەستپێبكاتەوە و گرێبەستەكە لە بەرژەوەندی خۆی یەكلابكاتەوە.

ئەو سەرچاوەیە ئاماژەی بەوەش كردوە، بەرشەلۆنە ئەو نرخەشی بە لاوە زۆرە و دەیەوێت بەشداری بە فلیپ كۆتینۆ بكات بۆ بە ئەنجام گەیاندنی ئەو گرێبەستە و كەمكردنەوەی برەكەی، ئەمە جگە لەوەی دەیەوێت فشار لەسەر یانە ئیتالیەكە دروست بكات تا ئەو 90 ملیۆنەش كەمتر بكاتەوە.