بریکارەکەی گریزمان داوای کۆبوونەوەی بەپەلە لە بەرشەلۆنە دەکات

پەیام سپۆرت - بڕیار تەها

ئانتوان گریزمان فەرەنسی لە هەڵسوکەوتەکانی کیکی سێتینی ڕاهینەری بەرشەلۆنە ڕازی نییە و بۆ ئەو مەبەستەش خوشکەکەی کە دەکاتە بریکارەکەی لەگەڵ کارگێڕی یانەکەی کۆ دەبێتەوە.

ڕۆژنامەی لوبارزیانی فەرەنسی لە نوێترین هەواڵدا سەبارەت بە بارودۆخی گریزمان ئاشکرای دەکات، خوشکەکەی ئانتوان وەک  بریکاری کارەکانی هێرشبەرە فەرەنسییەکە لە ئایندەیەکی نزیکدا گەشتی هەرێمی کەتەلۆنیا دەکات و لەگەڵ بەرپرسانی یانەی بەرشەلۆنە کۆ دەبێتەوە.

ڕۆژنامەکە نهێنی زیاتری درکاندووە و ئاماژە بەوە دەکات، ئانتوان گریزمان لە ڕێگەی بریکارەکەیەوە ئاگاداری کارگێڕی یانە کەتەلۆنییەکە دەکاتەوە کە نایەوێت ڕیزەکانی بەرشەلۆنە جێبهێڵێت و مانەوەی پێ باشترە، خوشکەکەشی دەیەوێت گرفتەکانی چارەسەر بکات و براکەی بۆ پێکهاتەی سەرەکی بگەڕێتەوە، تا ئەوەی لە ڕووی دەروونییەوە لەوە زیاتر گریزمان تووشی داڕمان نەبێت.