وادەی دوورخستنەوەی کیکی و شوێنگرەوەکەشی ئاشکرا دەکرێت

پەیام سپۆڕت - بڕیار تەها

یانەی بەرشەلۆنەی ئیسپانی بە بارودۆخێکی سەخت تێدەپەڕێت و ئەگەر ئەم وەرزە یانەکە هیچ نازناوێک بەدەست نەهێنێت، لە کۆتایی وەرزەدا کیکی سێتین دوور دەخرێتەوە و ڕاهێنەری لاوانی یانەکەش لە حاڵەتی دوورخستنەوەی کتوپڕدا شوێنی دەگرێتەوە.

 
هەردوو ماڵپەری جیهانی گۆڵ و espn زانیاری نوێ لە بارەی دۆخی نێوخۆیی یانەی بەرشەلۆنە بڵاو دەکەنەوە و ئاماژە بەوە دەکەن، ئەگەر یانەکە بەبێ نازناو کۆتایی بە وەرزەی ئەمساڵ بهێنیت، ئەوا بۆ وەرزی داهاتوو کیکی سێتین ڕاهێنەرایەتی یانەکە ناکات، لە ئێستاشدا پەیوەندی نێوان سێتینی ڕاهێنەر و یاریزانەکان لە دۆخێکی باشدا تێناپەڕێت و هەریەکە لە مێسی و سواریز داوایان لە کیکی کردووە چی دیکە سارابیای یاریدەدەری ڕێنماییان پێ نەدات و تەنیا گوێ لە خودی خۆی دەگرن.

سەرچاوەکان پێشیان وایە ئەگەر بەرشەلۆنە بەرانبەر ئەتلەتیکۆ مەدرید تووشی شکست ببێت، ئەوا بە ئەگەرێکی زۆرەوە کیکی دوور دەخرێتەوە و گارسیا پتمێنتای ڕاهێنەر لاماسیا و لاوانی یانەکە شوێنی دەگرێتەوە.