کلۆپ بێ منەتی خۆی لە ئاست مانچستەر سیتی ڕادەگەیەنێت

پەیام سپۆرت - بڕیار تەها

یۆرگن کلۆپی ئەڵمانی و ڕاهێنەری یانەی لیڤەرپووڵی ئینگلیزی ئارەزوو دەکات ڕووبەڕووبوونەوەی یانەکەی لەگەڵ مانچستەر سیتی لەسەر یاریگای ئیتیحادی ئەو یانەیە بەڕێوە بچێت.

میدیاکانی ئینگلتەرا باس لەوە دەکەن، یەکێتی تۆپی پێی ئینگلیزی لەگەڵ ڕێکخەران پرێمەرلیگ دەیانەوێت یاری نێوان مانچستەر سیتی و لیڤەرپووڵ لە میانی هەفتەی 32ی خولەکە لە یاریگایەکی بێ لایەن ئەنجام بدرێت، چونکە ئەگەر لیڤەرپووڵ لەو یارییەدا براوە بێت بە ئەگەرێکی زۆرەوە دەبێتە پاڵەوان و ترسی ئەوە هەیە هاندەرانی هەردوو یانەکە لە دەرەوەی یاریگای کۆ ببەوە و بەو هۆیەشەوە ژمارەیەکی زۆر تووشی ڤایرۆسی کۆرۆنا ببن.

لەم بارەیەوە کلۆپ بۆچوونی خۆی دەخاتە ڕوو و دەڵێت: وا باشترە یارییەکە لە یاریگای ئیتیحاد ئەنجام بدرێت، چونکە ئەگەر وا نەبێت ڕێكخستنی یارییەکە قورس دەبێت، لەگەڵ ئەوەشدا یانەکەمان ئامادەیە لە هەر شوێنێک بێت یارییەکە بکات.

لە درێژەی قسەکانیدا ڕاهێنەرەکەی لیڤەرپووڵ ئەوەی ڕاگەیاند، یارییەکە لە یاریگای ئەوان ناکرێت و ئەوەش واتایی ئەوە دێت ئەگەر لە یاریگای مانسیتی یارییەکە نەکرێت، دەبێت هەردوو یانەکە ڕوو لە شارێکی دیکە بکەن و شاندی هەردوو یانەش لە هۆتێل بمێننەوە ئەمەش تاکە گرفت دەبێت بۆیان.

لە کۆتاییدا کلۆپ باسی لەوەشکرد، تا کۆتایی چاوەڕوان دەبن بزانن یەکێتییەکە چ بڕیارێک دەدات و ئەم بڕیارەشی بۆ هەردوو یانەکە بە قورس وەسف کرد.