03/06/2020
873 جار خوێنراوەتەوە
جێگری سه‌رۆكی حكوومه‌ت: كۆمەڵی ئیسلامی خاوەنی هەڵوێستی نیشتمانیانەیە
قوباد تاڵەبانی جێگری سەرۆكی ئەنجومەنی وەزیرانی هەرێم بە بۆنەی نۆزدەهەمین ساڵیادی دامەزراندنی كۆمەڵی ئیسلامی-یەوە بروسكەیەكی پیرۆزبایی ئاڕاستەی ئەمیری كۆمەڵ و ئەندامانی ئەنجومەنی سیاسی و سەركردایەتی كۆمەڵی ئیسلامی كوردستان دەكات كە ئەمە دەقەكەیەتی:
بەڕێز مامۆستا عەلی باپیر ئەمیری كۆمەڵی ئیسلامیی كوردستان
ئەندامانی ئەنجومەنی سیاسی و سەركردایەتی كۆمەڵی ئیسلامی
نۆزدەهەمین ساڵیادی دامەزراندنی كۆمەڵی ئیسلامی، لە سەرجەم ئەندام و كادر و رێكخستنەكانتان، پیرۆز دەكەم و بەهیوام ئەم یادە ببێتە وێستگەیەكی نوێ بۆ بە‌رە‌وپێشچوون و سەركەوتنی زیاتری حیزبەكە‌تان.
لە ماوەی 19 ساڵی كاركردنی كۆمەڵی ئیسلامیدا، چ لەكاتی بەشداریكردن لە كابینەی حكومەت و چ لە دۆخی ئۆپۆزسیۆنیدا، بەردەوام خاوەنی هەڵوێستی نیشتمانیانە بووە. ئەمەش بنەمایەكی باش و رووبەرێكی كاركردنی هاوبەشی نێوان هەموومانە بۆ كاركردن لە پێناو خزمەتكردنی خەڵكی قوربانیدەری كوردستان و سوككردنی باری سەرشانیان لەو كێشە و تەنگەژانەی روووبەڕووی بوونەتەوە.
ئێمە لە حكومەتی هەرێمی كوردستان، خەباتی مەدەنی و پەرلەمانی و دیدی كوردستانیانەی كۆمەڵی ئیسلامی بەرز دەنرخێنین و خوازیارین هەموومان تواناكانمان یەك بخەین بۆ گەیشتن بە كەناری ئارام.
دووبارە ئەم یادە پیرۆز بێت.
قوباد تاڵەبانی
جێگری سەرۆكی ئەنجومەنی وەزیران
لە تۆڕە کۆمەڵایەتیەکان شەیری بکە