29/05/2020
360 جار خوێنراوەتەوە
"کۆرۆنا چوار ملیار دینار زیانی بە کەرتی گەشتیاری دھۆک گەیاندووە"
په‌یام
بەڕێوەبەری کاروباری پشکنین و جۆری لە بەڕێوەبەرایەتی گەشتوگوزاری پارێزگای دھۆک باسی له ئامار و داتاكانی كه‌رتی گه‌شتیاری شاره‌كه ده‌كات.
بەڕێوەبەری کاروباری پشکنین و جۆری لە بەڕێوەبەرایەتی گەشتوگوزاری پارێزگای دھۆک، شەماڵ ھروری رایگەیاند کە بەھۆی ڤایرۆسی کۆرۆنای نوێ (COVID-19)وە کەرتی گەشتیاری لە پارێزگای دھۆک بەتەواوی وەستاوە و ٩٠٠ شوێنی گەشتیاری لە کار وەستاون و ٧٠٠ کارمەندی گەشتیاری لە سنووری پارێزگاکە بێکار ماون و چوار ملیار دینار زیانی ماددی بەر کەرتی گەشتیاری پارێزگاکەیان کەوتووە.
لەم بارەیەوە شەماڵ ھروری بۆ ئاژانسی ئانادۆڵو گوتی: "نزیکەی ٩٠٠ بنکەی گەشتیاری و ٢٥٠ ھاوینەهەوار لە سنووری پارێزگای دھۆک بەھۆی ڤایرۆسی کۆرۆناوە لە کار وەستاون و ٧٠٠ کارمەند کە لەم شوێنانە کار دەکەن بێکار ماون و کەرتی گەشتیاری پارێزگای دھۆک نزیکەی چوار ملیار دینار زیانی بەرکەوتووە".
بەڕێوەبەری کاروباری پشکنین و جۆری لە بەڕێوەبەرایەتی گەشتوگوزاری پارێزگای دھۆک هەروەها گوتی: "لە ساڵی رابردوودا، ٥٠٠ ھەزار گەشتیار لە ناوخوی ھەرێم و خوارووی عێراق سەردانی پارێزگای دھۆک-یان کردبوو، بەڵام ئەمساڵ ئەو ژمارەیە زۆر دابەزیووە و لە ئەمساڵدا، تەنها ٧٠ ھەزار گەشتیار سەردانی پارێزگاکەیان کردووە ئەویش تەنها لە ئاھەنگەکانی سەری ساڵ".
شەماڵ ھروری لە بارەی ھاتنی گەشتیاران لە جەژنی رەمەزاندا بو پارێزگای دھۆک گوتی: "لە جەژنی رەمەزانی ساڵی رابردوو، ٦٠ ھەزار گەشتیار سەردانی پارێزگای دھۆک-یان کردبوو، بەڵام لە جەژنی رەمەزانی ئەمساڵدا، ھیچ گەشتیارێک سەردانی پارێزگاکەیان نەکردووە".
شەماڵ ھروری باسی لەوەش کرد کە بەڕێوەبەرایەتی گەشتوگوزاری پارێزگاکەیان پلانی ھەبوو کە بۆ ساڵی ٢٠٢٠ زیاتر لە ٧٠٠ ھەزار گەشتیار بھێنێت، بەڵام لەبەر ڤایرۆسی کۆرۆنا پلانەکەیان وەستاوە".
ھروری لە کۆتاییدا گوتی: "دوای کۆتایی هاتنی وادەی قەدەغەکردنی ھاتوچۆ چەند شوێنێکی گەشتیاریمان کردووەتەوە و لەگەڵ ژووری ئوپەراسیۆنی پارێزگای دھۆک لە پەیوەندیدان ھەر کاتێک ئەوان بڕیار بدەن ھەموو شوێنە گەشتیارییەکان دەکەینەوە و کار لەسەر ھاتنی گەشتیاران بۆ پارێزگای دھۆک دەکەینەوە".
لە تۆڕە کۆمەڵایەتیەکان شەیری بکە