15/05/2020
991 جار خوێنراوەتەوە
له‌دوای كۆرۆناوه ئابووری وڵاتی چین داكشانی بەرچاوی بەخۆیوە بینیوه
په‌یام
لەدوای دەركەوتنی پەتای ڤایرۆسی كۆڕۆناوە، ئابووری وڵاتی چین داكشانی بەرچاوی بەخۆیوە بینی، ئەمەش لە نزیك بە سێ دەیەی ڕابردوودا بۆ یەكەمجارە ڕوو بدات.
بەهۆی پەتای ڤایرۆسی كۆڕۆناوە كە سەرەتای كۆتا مانگی ساڵی ڕابردوو لە شاری (ووهان)ی نێوەڕاستی چین بڵاو بووەوە، ژمارەی كەسانی بێ كار لە چین بۆ زیاتر لە 70 ملیۆن كەس بەرز بووەتەوە و داكشانێكی ئابووری گەورەی دروست كردووە كە لە ساڵی 1992ـەوە بۆ یەكەمین جارە بەو ئاستە بگات.
ڕێوشوێنەكانی حكومەتی پەكین بۆ بەرگرتن لە بڵاوبوونەوەی زیاتری پەتاكە بووە هۆی داخستنی كارگە و كۆمپانیا و ناوەندە بازرگانییەكان و ژیان بەگشتی.
بەپێی زانیارییەكان، لە سەرتاسەری چین ئەو كەسانەی تەمەنیان لەنێوان 16ـ 59 ساڵیدایە و توانای كاركردنیان هەیە 890 ملیۆن كەسە، لەو ژمارەیە 70 ملیۆن كەسیان بێ كارن.
لەوبارەوە، نووسینگەی ئاماری نیشتمانی چین لە نێوەڕاستی مانگی ڕابردوو ڕایگەیاند: ڕێژەی داكشانی ئابووری بەهۆی كۆڕۆناوە لە چین لە چارەكی یەكەمی ئەمساڵدا بەراورد بە هەمان قۆناغی ساڵی ڕابردوو، لەسەدا 6.8 تێپەڕی كردووە.
لە تۆڕە کۆمەڵایەتیەکان شەیری بکە