ته‌ندروستی جیهانی له‌باره‌ی به‌رزبووه‌نه‌وه‌ی توشبوانی كۆرۆنا له‌عێراق هۆشداری ده‌دات

په‌یام

رێكخراوی تەندروستیی جیهانی رایگەیاند كە لەمیانی 10 رۆژی داهاتوودا، ژمارەی تووشبووان بە ڤایرۆسی كۆرۆنای نوێ "كۆڤید -19"  لە عێراق زۆر بەرزدەبێتەوە.

نووسینگەی رێكخراوی تەندروستیی جیهانی لە عێراق راگەیەندراوێكی بڵاوكردەوە و تیایدا ئەوە هاتووە "عێراق لە رووی تۆماركردنی ژمارەی گیانلەدەستدان بە ڤایرۆسی كۆرۆنا لە رۆژهەڵاتی ناوەڕاست دوای ئێران لە پلەی دووەمدایە".

تا ئێستا لە عێراق، 46 كەس بە ڤایرۆسی كۆرۆنا گیانیان لەدەستداوە و ژمارەی تووشبووانیش بە ڤایرۆسەكە گەیشتووەتە 630 كەس.

رێكخراوی تەندروستیی جیهانی ئاماژەی بەوەیشكردووە كە بەهۆی زیادبوونی پشكنینەكانەوە لەمیانی 10 رۆژی داهاتوودا، ژمارەی تووشبووان بە ڤایرۆسی كۆرۆنا لە عێراق زۆر بەرزدەبێتەوە.

روونشیكردووەتەوە كە لەئێستادا لە تاقیگەكانی نەجەف، بەسرە و بەغدا رۆژانە چوار هەزار و 500 پشكنین ئەنجامدەدەرێن كە چەند هەفتەیەك لەمەوبەر رۆژانە 100 پشكنین لەو تاقیگانە ئەنجام دەدران.

رۆژی پێنجشەممەی هەفتەی رابردوو، حكوومەتی عێراق قەدەغەكردنی هاتوچۆی بە ئامانجی رووبەڕووبوونەوەی ڤایرۆسی كۆرۆنا تا 11ی مانگی داهاتوو درێژكردبوویەوە.