هاری کەین زەنگێکی مەترسیدار بۆ تۆتینهام لێ دەدا

پەیام سپۆڕت - بڕیار تەها

هاری کەینی ئینگلیزی لە وەڵامی پرسیاری مانەوەی لە یانەی تۆتینهامی لەندەنی زەنگێکی مەتریسداری بۆ ئەو یانەیە لێ دا.

 هێرشبەرەکەی سپێرز بەهۆی مانەوەی لە ماڵەوە و لە پێناو خۆ پاراستن لە ڤایرۆسی کۆڕۆنا لە ڕێگەی تۆڕی کۆمەڵایەتی ئینستاگرامەوە و بە شێوەی لایڤ وەڵامی پرسیاری هەوادارەکانی داوەتەوە و سەبارەت بە پرسیاری ڕۆیشتنی لە یانەی تۆتینهام ئەو هێرشبەرە دەڵێت: هەمیشە ئەو پرسیارەم ئاڕاستە دەکرێت، ئەویش پرسیارێک نییە بە بەڵێ یان بە نەخێر وەڵام بدرێتەوە.

هاری کەین لە وەڵامدانەوەی پرسیارەکە بەردەوام دەبێت و پەیامێک بۆ یانەی تۆتینهام دەنێرێت و دەڵێت: من تۆتینهامم خۆشدەوێت و منیش کەسێک نیم تەنیا لە پێناو مانەوەدا لە یانەکە نەڕۆم، نەخێر دۆخەکە دەگۆڕێت ئەگەر هەست بکەم یانەکەم ناتوانێت پێشبکەوێت و لەسەر ڕێگایەکی ڕاست هەنگاو نەنێت.

لە درێژەی وەڵامی پرسیارەکەدا کاپتنەکەی سپێرز ئاماژە بەوە دەکات، ئەو یاریزانێکە ئامانجێکی زۆری هەیە و دەیەوێت ببێتە باشترین یاریزانی جیهان، ئەو مەبەستەشی پەیوەستە بەوەی لە یانەکەیدا چی ڕوودەدات، چۆن پێشدەکەون و شتەکان بە کوێ دەگەن.
لە کۆتاییدا هاری کەین دەڵێت: من دڵنیا نیم لەوە تا کۆتایی ژیانی وەرزشیم لە تۆتینهام دەمێنمەوە و یان بە پێچەوانەوە.