عەدنان زورفی لە بەغدا لەگەڵ باڵیۆزانی وڵاتانی ئەندام لە یەكێتیی ئەورووپا كۆبوویەوە

په‌یام

عەدنان زورفی، راسپێردراو بۆ پێكهێنانی كابینەی نوێی حكوومەتی عێراق لە شاری بەغدا لەگەڵ باڵیۆزانی وڵاتانی ئەندام لە یەكێتیی ئەورووپا كۆبوویەوە.

لەسەرەتای كۆبوونەوەكەدا، عەدنان زروفی سەرەخۆشی خۆی ئاراستەی وڵاتانی ئەورووپا كردووە لەوەی رۆژانە سەدان كەس لەو وڵاتانە بەهۆی ڤایرۆسی كۆرۆناوە دەبنە قوربانی.

هەر لەمیانی كۆبوونەوەكەدا راسپێردراو بۆ پێكهێنانی كابینەی نوێی حكوومەتی عێراق، عەدنان زورفی باسی لەو مەترسییانە كرد كە ئێستا عێراق، ناوچەكە و جیهان بەهۆی بڵاوبوونەوەی ڤایرۆسی كۆرۆناوە رووبەڕووی بوونەتەوە و راشیگەیاند كە ڤایرۆسەكە ئابووری و بازاڕەكانی جیهانی پەكخستوووە.

سەبارەت بە كاریگەرییەكانی ڤایرۆسی كۆرۆنا لەسەر بازاڕەكانی نەوتی جیهان، عەدنان زورفی رایگەیاندووە كە بڵاوبوونەوەی ڤایرۆسەكە مەترسی گەورەی لەسەر بازاڕەكانی جیهاندا دروستكردووە كە بەهۆی نرخی نەوت رووی لە دابەزین كردووە. جەختییشكردووەتەوە لەسەر ئەوەی كە عێراق توانای هەیە قەیرانی ئێستا تێپەڕێنێت و زیانەكانیش قەرەبوو بكاتەوە.

لە بەشێكی دیكەی كۆبوونەوەكەدا، عەدنان زورفی هەوڵەكانی بۆ پێكهێنانی كابینەی نوێی حكوومەت بۆ باڵیۆزانی وڵاتانی یەكێتیی ئەورووپا خستەڕوو و رایگەیاند كە كاری لەپێشنەی حكوومەتی نوێ جێبەجێكردنی داواكارییەكانی خۆپیشاندەران و ئەنجامدانی هەڵبژاردنی پێشوەختە، هەروەها كەمكردنەوەی ئاستی هەژاری دەبێت.

هەریەك لە باڵیۆزانی ئیتاڵیا، ئەڵمانیا، سوید، فەڕەنسا، یۆنان، پۆڵەندا، كرواتیا، نێردەی یەكێتیی ئەورووپا و نوێنەری وەزارەتی دەرەوەی عێراق لە كۆبوونەوەكەدا ئامادەبوون.